Mae’n paratoi at arddangosfa yn oriel Plas Glyn y Weddw, Llanbedrog fydd yn agor ar Fai 20fed.

Faint fwy o gerddorion/artistiaid gweledol Cymraeg fedrwn ni ffeindio tybed?

Aeth Gruff Rhys i goleg celf, felly hefyd Sam James o Blaidd a Poppies.

Mae Huw Evans yn creu gwaith celf ei fand H. Hawkline

Ac mae Rhys Aneurin, allweddellwr yr Ods, ymysg pethau eraill gwych yn portreadu enwogion y byd canu poblogaidd Cymraeg (gan gynnwys Meic Stevens)

Sgennoch chi fwy i gyfrannu? Oes ‘na ferched?

Gadwch wybod…

“Ap Gwilym” yw enw’r app diweddaraf yn yr iaith Gymraeg – teclyn go ddefnyddiol , fydd yn ein galluogi i ddod o hyd i odl heb bori dim pellach na’r ffôn lôn!

Anest Gwyn a Derick Murdoch sydd y tu ôl i’r fenter; cwpwl priod a oedd yn awyddus i ddechrau cwmni datblygu gwefannau dwyieithog, apiau symudol, a dysgu rhyngweithiol ar y cyd, yn dilyn eu penderfyniad i adael Caerdydd am Ogledd Cymru.

“Symud adref i mi, ond Albanwr ydi Derick ac mae Gwynedd yn agosach i adref na Chaerdydd”, meddai Anest, “doedd dim modd i ni symud ein swyddi felly sefydlu busnes oedd y peth naturiol i’w wneud… ac mae gennym ni gryn dipyn o brofiad yn y maes cyfryngau digidol”. Dechreuodd y diddordeb mewn aps pan oedd Derick yn gweithio i gwmni Tinopolis Interactive.

“Fo oedd yn gyfrifol am ddylunio ap Tywydd S4C, sydd wedi cael pum seren ar yr Apstore!”, meddai Anest.

Mei Mac (llun: Sian Owen)

Sgwrs gyda Mei Mac, golygydd Y Glec, a arweiniodd at y syniad, ac unwaith i Derick ac Anest sefydlu’u busnes, Galactig, aethant ati i weithio ar yr ap. Yn gyntaf, gyda syniad bras o’r strwythur, dechreuwyd braslunio wireframes. Gan ddefnyddio meddalwedd rhaglennu Apple, a thechnolegau gwe eraill, adeiladwyd ap prototeip cyn symud ymlaen at frandio a dylunio ar gyfer rhyngwyneb y defnyddiwr. Ond y dasg fwyaf oedd rhoi’r holl gynnwys yn yr ap – mae ’na bron i 600 o dudalennau cynnwys!

“Ond doedd dim brys i orffen Ap Gwilym, felly roedd digon o amser i goethi’r dyluniad a phrofiad y defnyddiwr”, yn ôl Anest, a oedd yn gyfrifol am roi’r cynnwys i mewn, a fformatio, tra’r oedd ei gŵr yn gwneud y gwaith dylunio a rhaglennu.

“Fersiwn modern o’r Odliadur yn dy boced ydy Ap Gwilym, sy’n gyfleus ac yn hawdd i’w ddefnyddio”, meddai Anest, “ond bydd hefyd yn helpu i hyrwyddo’r Gymraeg yn y farchnad ddigidol.”

Nid dyma’r tro cyntaf y mae odliadur wedi ymddangos mewn ffurf electronig, mae Odliadur Arlein Gwasg Aredig gan Geraint Jones wedi bod yn adnodd defnyddiol i ambell un sy’n ceisio llunio cerdd mewn swyddfa ers sawl blwyddyn, ond dyma fydd yr yn un cyntaf sy’n hawdd iawn i’w gludo efo chi.

Weithiau mae angen ffeithiau…

1874 : cyhoeddwyd “Geiriadur Y Bardd” dan olygyddiaeth Cynddelw

1978 : cyhoeddwyd yr Odliadur (Gwasg Gomer) dan olygyddiaeth Roy Stephens

1991 : cyhoeddwyd yr Odliadur clawr meddal

2008 : cyhoeddwyd yr Odliadur Newydd, fersiwn oedd yn cynnwys 5,000 o eiriau yn ychwanegol dan olygyddiaeth Alan Llwyd

Mae Alan Llwyd yn westai arbennig ar raglen Pethe heno. Bydd yn ateb cwestiynau yn y Gadair.

Pan roedd Mr Huw yn y gadair, dewisodd y gan hwn gan Neu Unrhyw Declyn Arall, sy’n cynnwys llawer o odlau : Mae Hywel yn Odli gyda Rhyfel

Bydd Ap Gwilym ar gael yn rhad ac am ddim i’w lawrlwytho unrhyw funud… gwyliwch y gofod!

Yr artist Bedwyr Williams sydd yn eistedd yn y Gadair y tro hwn, a’r penwythnos yma rhoddodd bapur newydd The Observer sylw i’w arddangosfa fwyaf eto – My Bad – a fydd yn agor yn oriel enwog Ikon, yn Birmingham ym mis Mai.

Mis Gorffennaf bydd Bedwyr, fel rhan o’r Olympiad Diwylliannol, yn rhoi sgwrs-berfformiad am ddiwylliant Cymru yn ei ffordd unigryw ei hun.
Bydd yn rhoi’r cyfle i’w gynulleidfa wisgo fel Derwyddon wrth iddo gyflwyno pynciau fel Cenedlaetholdeb Cymreig, is-ddiwylliannau a ffasiwn gan gyferio wrth fynd heibio at arwyddocad Evelyn Waugh, Ffermwyr Ifanc, y Beatles, y Maharishi (nid y band Cymraeg!), Brian Epstein a Mario Merz a pheth o hanes Gorsedd y Beirdd.

Cynhelir y noson yn Oriel Hayward yn Llundain ar Orffenaf 6ed ac mae tocynnau ar gael drwy wefan canolfan y South Bank.

Mwy o waith Bedwyr i’w weld ar ei wefan.
Cyfweliad diweddar yn y Western Mail

Mae drama cyntaf y bardd Gwyneth Lewis ar ei ffordd! Bydd ei fersiwn hi o’r chwedl Roegaidd Clytemnestra, yn cael ei llwyfannu gan Sherman Cymru rhwng Ebrill 18fed a Mai 5ed.

Dewisodd i osod y stori yn y dyfodol agos. Mae’r olew wedi darfod, ac mae’r byd yn ymladd am fwyd. I achub ei bobl, mae Agamemnon yn aberthu ei ferch i’w gynghreiriaid barbaraidd. Mae Clytemnestra, y fam a gafodd ei bradychu, yn llawn cynddaredd ac yn aros iddo ddychwelyd.

Godineb, phwer a dialedd sy’n gyrru’r addasiad newydd hwn o’r chwedl Roegaidd. Mae ymarferion yn mynd rhagddynt ar hyn o bryd

Mae cyfweliad gyda Gwyneth am y ddrama ar wefan Sherman Cymru a rhagolwg o’r sioe ar wefan Buzz

Yn 2006, fel rhan o’r Bedwen Lyfrau, recordiodd Y Sioe Gelf raglen arbennig i S4C a oedd yn edrych yn ol ar ganrif o gyhoeddi yn y Gymraeg, gyda bob math o gyfrannwyr yn dewis llyfrau o nod ac artistiaid yn cyfrannu perfformiadau i gyd-fynd efo llyfr o bob degawd. Llyfr y 1990au oedd Geiriadur yr Academi.

Dyma oedd barn rhai o gyfrannwyr y rhaglen ar “Y Briws”

Un o uchafbwyntiau’r noson oedd can a gyfansoddwyd a pherfformwyd ar y cyd rhwng Ifor ap Glyn a’r Genod Droog. Mwynhewch!

Erbyn hyn wrth gwrs mae fersiwn ar-lein o’r Geiriadur wedi ymddangos – roedd yn brosiect a ariannwyd gan Fwrdd yr Iaith Gymraeg ac yn ddatblygiad sydd wedi cael croeso brwd, ac ambell i sylw adeiladol ers ei lansio. Er bod y Bwrdd bellach wedi ei ddiddymu, bydd gwaith i addasu ac adnewyddu’r geiriadur yn parhau o dan arweiniad y Comisiynydd Cymraeg, Meri Huws a ddechreuodd ei gwaith heddiw.

Prif bwrpas yr Ŵyl yw rhoi cyfleon cyffrous i delynorion ifanc fwynhau mathau gwahanol o gerddoriaeth ac dysgu mwy am yr offeryn. Mae cyfle hefyd i berfformio’n unigol ac mewn grŵp a chael gwersi gael delynorion o fri rhyngwladol.

Yn ran o Ŵyl eleni rhoddir sylw i ddau berson oedd yn bwysig iawn yn hanes y delyn ac mae’n gyd-ddigwyddiad rhyfedd mai dim ond ychydig o ddyddiau oedd rhwng genedigaeth y ddau – y naill yn Ffrainc a’r llall yng Nghymru.

Sébastien Érard

Ganwyd SEBASTIAN ERARD ar 5ed Ebrill 1752 yn Strasbourg. Roedd yn ŵr a garai ddyfeisio a datrys problemau a’i athrylith ef a roddodd fodolaeth i’r delyn bedal fodern.

Ychydig o ddyddiau ynghynt, ganwyd y telynor EDWARD JONES, “Bardd y Brenin” yn Llandderfel. Fe wnaeth gyfraniad pwysig i ddiwylliant Cymru wrth gasglu alawon a hen benillion a’u cyhoeddi yn y gyfrol “Musical and Poetical Relicks of the Welsh Bards” (copi digidol fan hyn) yn 1784. Roedd yn delynor i’r brenin Sior lV a châi ei adnabod fel “Bardd y Brenin”.

I ddathlu cyfraniad y ddau gawr yma, bydd CATRIN FINCH telynores gyntaf y Tywysog Charles, yn rhoi cyngerdd ar nos Fawrth y 3ydd o Ebrill, i ddangos sut y datblygodd yr offeryn a’i cherddoriaeth o amser Erard a Bardd y Brenin i’n hoes ni. Bydd hefyd yn perfformio cerddoriaeth gyfoes ar y delyn drydan.

I agor yr Ŵyl, bydd ELINOR BENNETT yn chwarae cerddoriaeth gan Edward Jones a’i gyfoeswyr ar delynau a wnaed yn 1807, 1830 a 1904 gan Sebastian Erard ei hun. Yn dilyn bydd cyflwyniadau gan ddisgyblion a myfyrwyr y cwrs telyn. Heno ar Pethe bydd Elinor yn trafod pwysigrwydd Edward Jones a Sebastian Erard ond fel tamaid i aros pryd, dyma hi yn perfformio Symudiad Cyntaf, Sonata Dussek yn C leiaf.

Mae rhaglen yr wyl ar gael fan hyn a gellir prynu tocynnau i’r cyngherddau o wefan Galeri

Aeth Rhun i Brifysgol Bangor ymweld a Delyth Prys, yng nghanolfan Bedwyr i ddarganfod mwy am y problemau sydd wedi gwynebu e-gyhoeddi yn yr iaith Gymraeg. Mi gafodd y ganolfan technolegau iaith gomisiwn i wneud adroddiad i’r Cyngor Llyfrau ar gyhoeddi e-lyfrau yn y Gymraeg. Rhoddodd Delyth gyflwyniad i’r ymchwil yn ystod Hacio’r Iaith eleni – fideo i’w weld fan hyn. Ac os hoffech chi ddarllen yr adroddiad i gyd, dilynwch y linc o erthygl Iestyn Lloyd fan hyn.

Ac os oes ganddoch chi ddidordeb mewn cyhoeddi e-lyfrau, mae’n werth darllen erthyglau Iestyn

Cafodd Rhun air hefyd efo Llion Jones, sydd wedi cyhoeddi (efo help ei fab hynaf) fersiwn e-lyfr o’i gyfrol “Pethe Achlysurol“. Mae’n cynnwys deunydd fideo a lluniau yn ychwanegol i’r llyfr print, ac mae o  ar gael am ddim (i’r iPad2 yn unig).

Draw at Bedwyr ab Iestyn aeth Rhun wedyn i’w holi  ynglyn a sut yr aeth o ati i gyhoeddi fersiwn e-lyfr o Enoc Huws. Mae Bedwyr yn ddylunydd sydd wedi sefydlu sefydlu cwmni cyhoeddi Cromen, ac mae’n arbenigo mewn creu fersiynau newydd o lyfrau sydd allan o hawlfraint.

A ‘dan ni’n trafod hyn i gyd wrth i’r Cyngor Llyfrau, yn dilyn adroddiad Canolfan Bedwyr,  ddecrhau gwerthu e-lyfrau trwy Gwales. Wrth ymchwilio, mae’n ymddangos bod rhai e-lyfrau yn ddrytach i’w prynu o Gwales nag o wefannau’r  gweisg eu hunain. Ar gyfartaledd mae copi e-lyfr yn costio tua £1 yn llai na chopi papur.

Nid yw cyfrol Aneirin Karadog O Annwn i Geltia ar gael eto fel e-lyfr, ond fe ellir ei brynu gan eich siop lyfrau lleol a thrwy nifer o safleoedd ar y we…

Palas Print

Foyles

Gwales

a gallwch ddilyn y dyn ei hun ar twitter fan hyn.

Y cerddor Mr Huw yw’r ail westai i ateb cwestiynau tra’n eistedd yng nghadair Pethe.

Huw Owen AKA Mr. Huw

Roedd hi’n ddiwrnod niwlog pan aethom ni i gyfarfod  Huw wrth y Lon Goed er mwyn ei ffilmio yn y gadair ac roedd yn llawn cyffro am yr EP newydd.

Gewch chi weld pam wnaeth o ddewis  gosod y gadair fan hyn pan fydd yr eitem yn cael ei ddarlledu nos Lun nesaf (Mawrth 19eg) a bydd ei  EP newydd hir-ddisgwyliedig “EP i’r Afiechydon” yn cael ei rhyddhau fel lawrlwythiad ar 26 Mawrth 2012.  Mae Huw wedi creu nifer cyfyngedig o 100 o CDs efo cloriau unigryw wedi’u cynhyrchu â llaw gan nifer o’i ffrindiau a’i deulu.   Bydd y CDs ddim ond mond ar gael yn y gigs byw.

Hwn yw’r pedwerydd cynhyrchiad ganddo ac mae’n dilyn 3 albwm

Llond Lle o Hwrs a Lladron (2008),

Hud a Lledrith (2009)

Gogleddwyr Budr/Dirty North Walians (2010)

Cafodd ‘ep i’r afiechydon’ ei recordio dros gyfnod o 3 mis yn ei gartref yng Nghaernarfon ac mewn bwthyn diarffordd yn Chwilog. Yn wahanol i broses recordio ei albyms cynt, penderfynodd  y byddai’r ‘afiechydon’, ei fand byw, yn cymryd rhan fwy allweddol yn y cynhyrchiad y tro hwn. Yn ol Huw, mae hyn wedi dod ag elfen fwy meddwl-agored i’r broses greadigol ac wedi caniatáu dull mwy organig o recordio.

Huw sydd wedi cyfansoddi pob can sef Y Ferch Dryloyw, Y Frwydyr Gyson Rhwng Fi a Fi Fy Hun, Cân i’r Afiechydon a Vacuum

Yn perfformio efo Huw ar ganeuon yr ep mae Aled Wyn Jones ar ddrymiau, Rhys Llwyd ar  allweddellau ar ‘Y Ferch Dryloyw’, ‘Y Frwydyr Gyson Rhwng Fi a Fi Fy Hun’ a ‘cân i’r afiechydon’ a  Dylan Wyn Evans ar gitâr ar  ‘Cân i’r Afiechydon’. Yn clapio ar ‘Y Ferch Dryloyw’ mae Bleddyn Williams, Rhys Llwyd, Iwan Standley, Iwan Evans a Dylan Wyn Evans

Os mai ‘afiechydon’ yw enw’r band a’r ep, efallai na ddylem ni synnu bod iechyd personol Huw  wedi cael dylanwad ar y broses recordio. Ar y pryd roedd o wedi anafu ei asennau ac yn cymryd meddyginiaeth ‘dros y cownter’ ac mae’n siwr bod ei gyflwr corfforol ac effaith y cyffuriau wedi dylanwadu’n gryf ar y sŵn newydd a’r cynnyrch gorffenedig.

I gyd-fynd â rhyddhau’r ep, bydd mr huw yn chwarae’n fyw yn:
24/03/12 – Saith Seren, Wrecsam (hefo Sen Segur ac Eilir Pierce)
31/03/12 – Whitehall, Pwllheli (hefo Eilir Pierce)
06/04/12 – Pesda Roc Bach, Bethesda
20/04/12 – Angylsi, Caernarfon (hefo Eilir Pierce)
21/04/12 – Queens Hall, Arberth (yn cefnogi Race Horses)
23/06/12 – Tafwyl, Castell Caerdydd

Mae gwefan Mr Huw fan hyn

Diolch yn fawr i Huw am eistedd yn y gadair, trafod yr EP newydd ac yn fwy na hynny am roi help llaw a bon braich pan aeth fan y dyn camera yn sownd yn y mwd!

Mae rhaglen gyntaf y gyfres newydd yn cynnwys eitem am Barddas a’r Glec, a chyfweliadau efo’r golygyddion Twm Morys a Mei Mac. Bydd y ddau yn egluro pam fod angen dau gylchgrawn i drafod barddoniaeth Gymraeg , a chawn glywed barn rhai o bobol Aberystwyth am‘Y Glec’ a ‘Barddas’.

Twm ydi golygydd newydd Barddas, a bellach mae’r cylchgrawn wedi dod o’r wasg a chyrraedd y tanysgrifwyr a’r siopau ar ei newydd wedd.

Mae o eisoes wedi cael ymateb cadarnhaol gan ddarllenwyr a bydd Twm yn ymhelaethu ar y cynnwys ac am ei weledigaeth am y dyfodol yn ystod yr eitem. Wrth ei gyfweld wnaethon ni holi Twm am ei farn ynglyn a defnyddio’r we i gyrraedd cynulleidfa ehangach.

Ers recordio’r cyfweliad mae gwefan Barddas wedi ei diweddaru ac fe ymddangosodd cyfrif @trydarbarddas ar twitter neithiwr. Mae pethau’n amlwg yn datblygu felly! Ond i fod yn deg, ar gyfer cynhyrchu 4 cylchgrawn y flwyddyn ac nid i gynhyrchu cynnwys electronig y mae’r Gymdeithas Gerdd Dafod yn derbyn ei nawdd o £24,000 gan y Cyngor Llyfrau. Mae’n siwr bod hynny’n ffactor ymarferol bwysig yng nghanol pethau ond braf yw gweld Barddas yn cyfathrebu ar draws sawl cyfrwng.

Nid yw’r Glec ar y llaw arall yn derbyn nawdd o gwbl, roedd yn aflwyddiannus yn ei gais i’r Cyngor Llyfrau y llynedd, a ‘llafur cariad’ ydi’r gwaith y mae Mei Mac yn ymgymryd a hi bob mis i gyhoeddi’r cylchgrawn.

Ymddangosodd gwefan Y Glec gyda’r rhifyn gyntaf yn ol ym mis Gorffennaf y llynedd ac arni fe ellir tanysgrifio, prynu ol-rifynau (papur) o’r cylchgrawn a llyfryn (papur) o eiriau acennog. Mae’n bosib hefyd i chi hoffi’r cylchgrawn ar Facebook.

OND efallai mai’r Glec sy’n cynnig un o’r pethau mwyaf cyffrous i feirdd sy’n hoff o dechnoleg. Cyn bo hir, bydd y Glec yn cyflwyno “Ap Gwilym” – sef odliadur ar ffurf app, neu raglen i’r iPhone.

Cwmni Galactig sydd yn datblygu ac yn rhyddhau Ap Gwilym ar y cyd efo’r Glec a disgwylir iddo fod ar gael i’w lawr-lwytho oddi ar iTunes yn ystod mis Ebrill. Mae Pethe wedi cyfweld y datblygwyr ac wedi cael gafael ar gopi prawf o Ap Gwilym – cadwch lygad ar y blog am fwy o fanylion cyn hir.

Ap Gwilym : odlau ar eich iPhone

Vivienne Rickman-Poole, ffotograffydd lleol o Lanberis sy’n gyfrifiol am arwain y grŵp i greu’r arddangosfa unigryw yma. Hefyd yn arddangos mae:

Yr artist a’r gwneuthurwr print Eleri Jones

Y ffotograffydd Ewa Bloniarz

Yr artist metel  Wendy Leah Dawson

Nerys Jones sydd yn gweithio mewn sawl cyfrwng ac yn  cyfuno amrywiaeth o ddulliau trin tecstiliau.

Y gof arian  Miranda Meilleur

Chloe Needham sy’n gweithio yn bennaf gyda dyfrlliw a thorri papurl

Ac Annwen Burgess sydd yn arddangos casglaid o luniau sy’n canolbwyntio ar fywyd y teulu a gwrthrychau bywyd bob dydd.

Mae Delyth Gordon yn  trafod yr arddangosfa tra bod Rhun yn sgwrsio gyda dwy o’r artistiaid sy’n arddangos, Eleri Jones a Nerys Jones.

Mae gwaith Nerys Jones yn dychanu’r syniad o’r dduwies domestig, ac mae hi’n teimlo bod yna ormod o bwysau ar ferched i “wneud popeth eu hunain” tra’n ceisio cadw cartref, teulu a gyrfa i fynd yr un pryd. Ond  mae’r diddordeb yn y crefftau llaw traddodiadol ar gynnydd, a hynny mewn adeg o ddirwasgiad.  Mae’r gair ‘nostalgia’ yn cael ei ddefnyddio’n aml wrth drafod dylanwad merched fel Cath Kidston a Kirstie Allsopp. Ai awchu’n ramantus i fyw mewn cyfnod arall ydan ni neu a oes wir gwerth i ni mewn creu pethau ein hunain?

Yn ôl Rhiannon Parry, golygydd Y Wawr, mae popeth yn mynd rownd, a tydi hi ddim yn synnu bod crefftau fel hyn wedi dod yn ôl yn ffasiynnol eto.  Aeth o erioed allan o ffasiwn iddi hi!

Oes gan y dirwasgiad rhywbeth i’w wneud efo’r cynnydd mewn pobolgrwydd tybed? Nid yn ôl Rhiannon; ” Mae gormod yn cael ei wneud am y dirwasgiad.  Yn ystod y 30au roedd dirwasgiad difrifol, ac roedd nifer o ddynion yn ymgymryd â gwau bryd hynny.  Roedden nhw’n dda hefyd, ac yn gallu gwau yn gyflym iawn!

Mae hi fodd bynnag yn brolio safon dillad wedi eu gwau efo llaw  ac yn gweld ei hun yn arbed ariad drwy wneud hynny. “Os cewch chi gwlân da, mae’r dilledyn yn para’ ac yn cadw rhywun yn gynnes iawn.”

Lle mae dechrau felly? Yn ôl Rhiannon, tydi pobol ddim yn cael eu dysgu i wau y dyddiau yma, ond o gael y cyfle, mae hi’n gweld pobl yn cael gafael arno ac yn falch bod clybiau gwau a gwnio yn tyfu fel madarch drwy’r wlad.

“Does dim difyrrach na chyfarfod rhywun â’r un diddordeb, a chymharu nodiadau. Mae clybiau a grwpiau fel hyn yn gwneud andros o les i bobol. Mae’n fodd o ymlacio, ac mi, bron bod rhaid imi  ei wneud!”

Mae’r ddarlledwraig ac awdur y blog Paned a Chacen, Elliw Gwawr, newydd ddechrau grwp gwau yng Nghaerdydd.

Tra’n byw yn Llundain dechreuodd hi fynychu dosbarthiadau a grwpiau lle dysgodd sut i wau, gwnio, gwneud canhwyllau, ac yn y blaen.  Er ei bod yn cofio gwneud ychydig gyda’i Mam pan yn iau, gan nad oedd gorfodaeth i gario ’mlaen â’r crefftau yma, aeth yn angof ganddi.  Ond mae hi’n meddwl bod merched ifanc y dyddiau yma’n gwneud ymdrech i ailafael yn y crefftau rhag iddyn nhw fynd yn angof.

Os mai ymateb i’r dirwasgiad, mewn ffordd, ydi hwn, tydi Elliw ddim yn meddwl bod rhywun yn safio rhyw lawer.  “Mae gwlân yn ddrud! Ond mae’r teimlad o fod wedi cyflawni rhywbeth, ei wneud i gyd o ddim byd, yn deimlad braf!”

Mae grwp gwau Elliw yn cyfarfod yn y bar yng nghanolfan Chapter yn Nghaerdydd ac mae hi’n cyfaddef mai un o’r rhesymau dros sefydlu’r grwp ydi esgus i gymdeithasu.   “Mae mynd allan lot yn ddrud, ond mae hwn yn ffordd o ddiddori eu hunain mewn ffordd rhad.”

Bu Rhun yn ymweld â grwp gwnio sy’n cael ei threfnu gan Menter Caerdydd yn ddiweddar, a bydd yr eitem i’w weld ar Pethe ar Fawrth 19eg.

Mae Oriel Pendeitsh, Caernarfon ar agor 10.00 – 3.30 o ddydd Llun tan ddydd Sadwrn, a’r addangosfa Wyth yn parhau tan Fawrth 17eg.