Cyfaddefodd John Toshack mai Sweden oedd yn haeddu ennill y gêm gyfeillgar yn erbyn Cymru nos Fercher.
Ymosodwr Bolton, Johan Elmander, rwydodd unig gôl y gêm â foli gelfydd funud cyn yr egwyl yn Stadiwm Liberty, Abertawe.
"Cawsom ni ddechrau digon da yn y 15 neu 20 munud cyntaf," meddai Toshack wrth Sgorio.
"Ond wrth i’r gêm fynd yn ei blaen fe ddaeth (Sweden) yn ôl i reoli a ‘dwi’n credu eu bod nhw’n llawn haeddu’r fuddugoliaeth.
"A bod yn onest fe allwn ni fod wedi ildio llawer iawn mwy."
